تجربتي الشخصية لجهاز أونر 30 Pro Plus

تجربتي الشخصية وية أونر 30 برو بلص ، الجهاز حصري للصين لكن اكو كم نسخة منه بالعراق فخاف يمر عليكم.

› خدمات كوكل : خدمات كوكل مو ضرورية بالصين لكن خارجها اعتمادنا على كوكل رئيسي ، تحميل التطبيقات و تحديثهن بكل سهولة من غير تطبيقات كوكل مثل كوكل كيب ميشتغل ، اضافة صورة لترجمة كوكل متشتغل ، الصفحات المحفوظة بكوكل كروم ماكو لأنه متكدر تسجل دخول ، الحسابات و كلمات المرور المحفوظة بحساب كوكل من غير الالعاب و البرامج المربوطة بحساب كوكل. صح اكو بدائل لكن كلهن ميعوضن بشكل كامل خدمات كوكل.

› الواجهة : واجهة EMUI 11 ما قاصرة من ناحية السلاسة لكن نكدر نكول قبيحة جداً و بواجهة HarmonyOS 2.0 أو EMUI 12 أو MagicUI 5 الواجهة صارت احلى بمراحل و اسلس بعد  لكن بعدها تنقصها مزايا بسيطة مثل تفعيل الوضع الليلي بشكل تلقائي و بعد التحديث لـ HarmonyOS التحديثات الأمنية صارت تجي بشكل اسرع و تقريباً ماكو تحديث مضيف ميزة جديدة ، و نشوف شيضيفون بالمستقبل.

› الشاشة : هي OLED منحنية قياس 6.57 انش دقتها FHD+ و ترددها 90Hz ، كلنا نعرف شاشات OLED شلون زينة ما اتوقع اكو شي اكدر اضيفة هنا و تردد 90Hz زين و اشوفة اختيار افضل من 120Hz بالحكم انه الجهاز بطاريته صغيرة و الي بعدين اشرح عليها.

› الاداء : الجهاز يجي بمعالج Kirin 990 برام 8GB LPDDR4X و ذاكرة 256GB UFS 3.0 اتوقع ، بدون مبالغة بس من جد طول فترتي لأستخدام الجهاز معلك او صار عندي كلج لمرة وحدة ابداً و قدملي اداء و سلاسة شفتها افضل من OnePlus 8 Pro بمعالج SD865 و شاشة بتردد 120Hz يعني بشكل عام فدشي و مو قاصر ابداً ، من ناحية الألعاب فأني العب Genshin Impact بشكل مستمر على 60 فريم و اعدادات متوسطة و بدون أي فريم دروب و بدون تبريد هم ، تكدر تشغل اعلى اعدادات و 60 فريم لكن هنا يحتاج تبريد و بما انه دنحجي على التبريد الجهاز فالجهاز أي حرارة ما بي سواء بالاستخدام العادي أو Genshin Impact على 60 فريم و كرافكس متوسط.

› البطارية : هي 4000mAh بقدرة 40W و بقدرة 27W لاسلكي و بقدرة 5W شحن عكسي للاكسسوارات الي تدعم الشحن العكسي. البطارية هنا قدمت اداء زين مقابل حجمها و بدون صرف بالستاند باي ، على 90Hz و العاب و استخدام عادي تنطي بحدود الـ 5 ساعات و تختلف حسب الاستخدام اكيد جان صارت افضل لو حجم البطارية أكبر بعد شوية لكن ما اتوقع تكدر تسوي شي بهالخصوص.

› الكاميرات هي :

• كاميرا اساسية 50MP f/1.9 مع مثبت بصري و ليزر Autofocus

• بيروسكوب تيليفوتو 8MP f/3.4 مع مبثت بصري و زوم بصري ×5 و زوم الكتروني ×50 (تكدر تصور القمر)

• عدسة واسعة 16MP f/2.2

• مستشعر عمق 2MP

• كاميرا امامية 32MP + عدسة واسعة 8MP

الثقب الامامي المزدوج جبير  و مزعج و صعب يختفي عن العين مثل الثقب الواحد ، و نادر استخدمت العدسة الواسعة الامامية لأنها بشكل اساسي لسيلفي المجموعة و انا (No friends) اما الكاميرات الخلفية فممتازة كالعادة من هونر الوان و تفاصيل حلوة و التيليفوتو كذلك صورة حلوة بزوم بصري ×5 اما النايت مود فهواوي معروفة بالنايت مود شلون زين بحيث تاخذ صورة بمكان مظلم و كأنها نايت مود اما النايت مود الفعلي يحتاج تثبت الجهاز و وقت علمود ياخذ صورة و بالأخير تطلع كأنها بنص الظهر.

› اشياء ثانية :

• السماعات ستيريو لكن صوت السماعة السفلية اعلى من العلوية و صوت الجهاز بأعلى مستوى للصوت كلش عالي بشكل يعني.

• منفذ هيدفون ماكو لكن اكو تحويله منفذ هيدفون 

• يدعم 5G اذا يهمك الأمر

• الجهاز يدعم ذاكرة خارجية لكن فقط المخصصه من هونر معرف شسم نوعها

• البصمة تحت الشاشة سريعة و ولا مرة خطأت عندي و التعرف على الوجه ممتاز كذلك

• بعض تطبيقات النظام بيها لغة صينية فقط لأنه الجهاز اصلا موجه للصين فقط

› أشياء ازعجتني :

• بس تطلع من التطبيق الواجهة تنحرة بحيث كلشي يوكف بعد والاشعارات هم و علمود هيج اداء البطارية زين.

• اكو بعض النقوصات بالواجهة مثل مذكرت لكن HarmonyOS 3.0 حتنزل قريباً.