Honor Magic 2 تحت الميكرسكوب :)

اهلا هونور فانز :)

اتكلمنا فى موضوع قبل كدا  هنـــا عن الهونور ماجيك 2 ووعدتكم بمراجعه تفصيليه للهاتف

النهارده وبعد 3 ايام استخدام حابب اتكلم عن الهاتف بالتفاصيل شويه

[اولا محتويات العلبه]

والمحتويات زى ماهو موضح فى الصوره

- كوفر اسود جميل جدا وافضل بكثير من الكوفر الشفاف المعتاد مع الاجهزه

- شاحن سريع وهو نفس شاحن الهواوى ميت 20 برو

- كابل الشحن وهو من نوع تايب سى

- محول للسماعه لان للاسف الهاتف لا يوجد به مخرج خاص بالسماعه

[شكل الهاتف وتصميمه]

شكل الهاتف رائع جدا بدون اى حواف على الأطلاق الضهر من الزجاج ويوجد طبقه حمايه على الزجاج الأمامى والخلفى

مسكه الهاتف فى الأيد جميله جدا تحس ان الهاتف تقيل شويه لكن دا بيعطيه ثبات اكتر فى الايد واحساس فخامه الفلاجشيب

الوان الضهر تحفه بمعنى الكلمه بتدرج الوان جميل جدا بيعطى شكل فخم للموبايل وخاصه مع انعكاس الضوء

الأسلايدر   سحبه الأسلايدر سهله جدا وجميله فى الايد فيها مزيج غريب بين المقاومه والسهوله مع صوت بيخرج من الهاتف مع الحركه بيدى نتيجه رائعه

بعد الأسلايدر بيظهرلك 3 كاميرات سلفى  مع السينسورز الخاصه ببصمه الوجه والسماعه

وعلى عكس المتوقع المكان دا متاثرش معايا بالاتربه كان دايما كويس ونضيف

[الحمايه]

طبعا عندنا الرقم السري والباترن المعتادين لكن ولأن الهونور ماجيك 2 مختلف تماما عن اى هاتف اخر فايضا متوفر بصمه الوجه وهى بصمه امنه تماما لانها عن طريق السينسورز وليس عن طريق الكاميرات واللى فعلا بقى بيخلي الهاتف مختلف وسااحر جدا هى بصمه اليد اللى مدمجه بشكل رائع فى الشاشه

والبصمه هنا شغاله كويس جدا وبتدى احساس عظيم وانت بتلمس الشاشه بصابعك فتقرا بصمتك وتفتح مع حركه موجيه وديزاين مبهر الصراحه

الصراحه يا جماعه من حلاوه الاسلايدر والبصمه هتلاقى نفسك عمال بتجرب فيهم من غير ما تكون محتاجهم اصلا

[المواصفات]

بنتكلم على هاتف فلاجشيب يعنى بنتكلم على مواصفات عاليه وعتاد قوي

الهاتف بيديك تجربه اداء روعه جدااا سرعه عاليه مع جميع الالعاب اداء البطاريه اكثر من ممتاز شاشه جيده جدا واضائه ممتازه

الهاتف اكيد بيشتغل مع بابجى على اعلى جرافيكس وبيكون حاجه مختلفه تماما عن اى هاتف اخر فى السرعه والجرافيكس

[الكاميرات]

الحقيقه الكاميرات تحتاج لموضوع اخر خاص بيها الهاتف فيه 6 كاميرات واااااو  

الأماميه

3 كاميرات الاولى 12 ميجا بكسل بفتحه عدسه 2.0 والتانيه 2 ميجا بفتحه عدسه 2.4 والتالته 2 ميجا بفتحه عدسه 2.4 الكاميرا بتصور HDR وبتصور فيديوهات بدقه 1080p@30

بتعطي صور ممتازه فى كل الاضائات والصور خير دليل :)

الخلفيه

3 كاميرات الاولى 16 ميجا بفتحه عدسه 1.8 والتانيه 16 ميجا بكسل بفتحه عدسه 2.2 والتالته 24 ميجا بكسل بفتحه عدسه 1.8

وطبعا بتصور فيديوهات بدقه رهيبه 2160p@30fps, 1080p@30fps, 720p@480fps

وفى 3 اوضاع 1X و 2X و  wide وهنا صوره تبين الفرق بين ال 3 اوضاع لنفس المكان من نفس موقع التصوير

فطبعا شىء عظيم انك تقدر تصور ب3 اوضاع مختلفه وبصراحه عجبنى جدا الوايد انجل واللى ممكن تساعد فى تصوير الاماكن بطريقه افضل او تاخد عدد اكبر من التفاصيل والاشخاص فى نفس الصوره

اسيبكم مع مجموعه صور لاوضاع مختلفه ومستنى تعليقاتكم واسالتكم

Night mood

Food

Cromo

الخلاصه الهاتف رائع جدا سواء للناس اللى مهتمه بالالعاب معاك 8 جيجا رام ومعالج KIRIN 980  بيعطوك اداء خرافى او للناس اللى مهتمه بالكاميرا والتصوير بكاميرات منفرده عيوب الهاتف اللى اكتشفتها من وجهه نظرى ممكن الوزن التقيل الى حد ما للناس اللى مبتحبش وزن كبير وعدم وجود مخرج خاص بالسماعه واكبر عيب للهاتف انه غير متوفر فى سوق الشرق الاوسط لكن بامكانك شرائه اونلاين بما يعادل تقريبا 2000 ريال سعودى او 2000 درهم اماراتى .